LaDonna Tamakawastewin Bravebull Allard

Lu‘ulu‘u Pu‘ukapu i ka ua nui
Auē ke aloha piha iā ‘oe e ku‘u ‘Anakē nona ka inoa hanohano ‘o LaDonna Tamakawastewin Bravebull Allard
Ka wahine āiwaiwa o Pōhaku Kū
Ka wahine koa o Pōhaku Kapu
Ka wahine kūpā‘a no ka pono o ka Honuanuiākea
Ka hiapa‘i‘ole o ka ‘āina hau anu
Ka hoa welo like o ke aukahi
Ka hoa pili ‘o Kalāhikiola
Auē ke aloha nui iā ‘oe, e ku‘u ‘Anakē
Ua ku‘u ka luhi o kou kino kanaka a ho‘i akula kou wailua i ke alo o Wākea
Na Kea nō e alaka'i iā ‘oe i ka poli o nā kūpuna
Na ko kūpuna nō e alaka‘i iā ‘oe i ka pō uli o ke kumu ola
Na kāu kōko‘olua aloha mau e alaka'i iā ‘oe i ka mālamalama o ke ao, e Tamakawastewin
Auē ka maka‘ūpē
Auē ke kani‘uhū
Auē ka mānewanewa
Auē ka mokumokuāhua
Auē ke aloha launa ‘ole iā ‘oe
Palena ‘ole ku‘u aloha a me ku‘u mahalo iā ‘oe no kou ‘onipa‘a mau no ke aloha ‘āina ‘oia‘i‘o
Palena ‘ole ku‘u aloha a me ku‘u mahalo iā ‘oe no kou kūlana waiwai i ko‘u ola
Ua ho'omoea nō ke alaula
‘O ke ala ia e hele ai
‘O ka pūnohu
‘O ka puna kea
Lele wale i ka lani

na Hāwane Rios
Lā 10 o ‘Apelila 2021
Pu'ukapu, Waimea, Hawai‘i Kuauli